Næturvaka

Í þúsund ár

stóðum við vörð Drottins 

og töldum hann 

sniðinn örlögum okkar.

Jafnvel dægur

sætti okkur við dóm smáblómsins.

En tími okkar var einungis mældur

í einni næturvöku.    

 

Og í eilífum Skógum 

spratt teinungur

í kviku augnabliksins. 

 

Nú gróa þar íbjúgar

litbjartar liljur

úr annarri veröld

- í fullri sátt

við Guð og okkur.


« Síðasta færsla | Næsta færsla »

Athugasemdir

1 Smámynd: Hólmfríður Pétursdóttir

Strengur hins eilífa augnabliks í kristinni trú er mér mjög kær. Andlátsorð mikils trúmanns lýsa þessu vel: ,,Nú er Jesús að rísa upp fyrir mig."

Hólmfríður Pétursdóttir, 20.11.2009 kl. 01:01

2 Smámynd: Sigurbjörn Sveinsson

Andlátsorð Sigurbjörns Einarssonar geta orðið þráður í mikinn og jafnvel stórfenglegan texta.

Sigurbjörn Sveinsson, 20.11.2009 kl. 10:13

3 identicon

Sæll Sigurbjörn.

Mikið óskaplega er þetta fallegt kvæði.

Bestu þökk.

Ein lítil athugasemd: í einni næturvöku (ekki á) ??

Húsari. (IP-tala skráð) 20.11.2009 kl. 12:45

4 Smámynd: Sigurbjörn Sveinsson

Jónas naut þess, að um drög að ljóðum hans fór fram lýðræðisleg umræða. Hann átti vini, sem smekkmenn voru á íslenska tungu.

Það er Húsari líka.

Því vil ég fella athugasemd hans að ljóðinu en um leið breytist merkingin úr andrá augnabliksins í tíma í rúmi. Við skulum prófa þetta.

Sigurbjörn Sveinsson, 20.11.2009 kl. 12:56

5 identicon

Þakka hlý orð.

Kvæðið vekur upp áleitnar spurningar um gildismat:
Hvað skiptir máli, hvar og hvenær eða er það svo að
ekkert skiptir neinu máli?
Síðasta erindið er áhrifamikið.
Það endurspeglar lífsviðhorf sem skiptir máli
og er ekki til sölu.
Til hamingju, Sigurbjörn, enn eitt kvæði sem gnæfir yfir
sem standbjörg þar vestra.

Húsari. (IP-tala skráð) 20.11.2009 kl. 14:06

6 identicon

Til hamingju með þetta nafni minn. Þetta er frábært. Eilífðin er augnablik sem aldrei líður. Þar sem hin ólýsanlegu og dásamlegustu augnablik verða að eilífð.

Hvað ertu kominn með mörg ljóð í safnið?

Eigum við að fara að túra um landið?

Sigurbjörn Þorkelsson (IP-tala skráð) 20.11.2009 kl. 15:22

7 identicon

Hvað ættlið þið að túra með ?  Ljóðin hans Sigurbjörns S. eru til þess að lesa í rólegheitum, upp í rúmi.  Als ekki undir gítarleik á Krákunni eða öðrum slíkum knæpum.  Þau rista vel í vitundina og vel gæti verið að hægt væri að sá viksufræju, eftir plóginn?

Ólafur Sveinsson (IP-tala skráð) 22.11.2009 kl. 23:26

8 identicon

Er ekki hægt að túra bara án þess að lesa á knæpum. Veit ekki betur en margar fallegar kirkjur landsins bjóði upp á hentugt húsnæði til ljóðalesturs og tóna... eða jafnvel umræðna. Ég styð túr pabbi minn - og svo bók.

Ásta Sóllilja (IP-tala skráð) 23.11.2009 kl. 18:42

9 identicon

Sæll Sigurbjörn.

Mér varð það á að fara ranglega með titil nýrrar
ljóðabókar Matthíasar Jóhannessen á dögunum.
Bréfið var stílað á nákominn ættingja. -
Síðdegis 12. október fór Matthías með nokkur
ljóðanna á Ras 1. Þar var svo sannarlega boðið til
veislu í bókmenntalegum skilningi en tregafullur
bakgrunnur hefur tæpast látið nokkurn ósnortinn.
Af litlum efnum vil ég leyfa mér að halda því fram að
Matthías sé á hátindi listar sinnar.
Ég hygg hvað þig sjálfan snertir að þá sé það afar
forvitnilegt að fylgjast með ljóðagerð þinni á
næstu árum.
Ég efast ekki um það eitt andartak að hljóðbók með
ljóðum þínum yrði veltekið; en skal fúslega viðurkenna
að bók er miklu betri hugmynd og fátt sem kemur í stað
þess unaðar að eiga að athvarfi um óttubil velorðaða
og sanna hugsun.

Húsari. (IP-tala skráð) 25.11.2009 kl. 22:18

10 identicon

Mattías var bestur í fyrstu bókinni, ferskur og fínn. Aftur á móti batnaði Snorri með árunum, eins og Highland Park í góðri tunnu.

Ólafur Sveinsson (IP-tala skráð) 28.11.2009 kl. 02:19

11 identicon

Sæll Ólafur.

Nú verðum við báðir að ganga til Róms og fara með
10 Maríubænir að auki fyrir að fara ekki rétt með nafn
Matthíasar (Matthías Johannessen).
Ástriðan er að sönnu ekki söm og jöfn en þó hygg ég
bók þessi innihaldi ljóð t.d. Blómstrið eina sem ´
Íslendingar munu lesa að 100 árum liðnum, og þau
allnokkur árin til viðbótar, til jafns við Um dauðans óvissa(n) tíma
og Heyr himnasmiður og hið sama finnst mér verðskulda 
hið ágæta kvæði, Næturvaka. 

Húsari. (IP-tala skráð) 3.12.2009 kl. 11:21

12 identicon

* Um dauðans óvissa(n) tíma > Les: Um dauðans óvissa tíma
(erindi þessi eru a.m.k. 13 og kemur fram í upphafserindum
 að hér er án nokkurs vafa rétt með farið)

Húsari. (IP-tala skráð) 4.12.2009 kl. 11:01

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband