#metoo

Maður gengur fyrir horn

og skyndilega er vindurinn í fangið.

Eins og andardráttur fjöldans,

ísnálar og klammaðir kjálkar.

Ljúf byrði hversdagsins

breytist í ok andúðar

og á baki vinanna

má sjá tannlaust glott

hverfa inn í hríðina.

 

Eins og bóndinn fyrir vestan

gekk ég í hringi í þrjú dægur

á meðan kafaldið kvaldi úr mér lífið.

 

Þúst á berangri umvafin hvítri voð

og ástvinirnir áhyggjulausir,

innan seilingar.

Athugasemdir

[Jónatan Karlsson, 1.2.2018 kl. 07:11]

Grípandi lýsing.

[Húsari. (IP-tala skráð) 2.2.2018 kl. 12:24]

Sæll Sigurbjörn.

Tek undir það sem Jónatan ritar hér að framan.

Höfundur leikur sér með myndbreytingar sem og
viðlíkingar og öllu þessu er stefnt í umbúnað
sem er í senn kaldur og fráhrindandi; titill
og ljóð mynda athyglisverða, fíngerða samhverfu.

Hún er nöturleg en framúrskarandi velgerð.