Í Brimnesi

 I.

Þegar ég gekk í hús þitt,

þá fann ég ekkert nýtt.

Alla klassíkina

hafði ég fyrir löngu lifað.

Vívaldí og vinirnir allir

voru þarna á sínum stað.

 

Í sprungnum veggjum hússins

ómaði hjal barna minna,

og sporin sá ég,

sem þau stigu í bernsku sinni.

 

Þá minntist ég meistarans,

sem fóstraði hugsunina

í faðmi trúarinnar:

 

"Endurtekningin er ekki til."

 

En úti fyrir

hafði blær vorsins

hrifið burt gamlan kunningja.

Fönnin skildi eftir benjar

í gróandanum.

 

Sköpunin er endurtekning alls.

 

(6. júní 1989)

 

II.

Ég settist niður

til að semja ljóð

eins og síðast.

En ljóð er ferðalag

frá einni hugsun til annarrar

eins og allir vita.

 

Og sálin náði ekki fluginu.

 

Hún var föst í möskvum gærdagsins,

neti persónulegrar reynslu.

Sú reynsla venjulegs manns

eins og mín

er bæði hversdagsleg

og alþýðlega óspennandi.

 

Það hefðu orðið örlög þess ljóðs

að vera kastað

á ruslahauga borgaralegrar menningar.

 

(2. desember 1990)

Höfundur var læknir í Búðardal með hléi frá 1978 til 1988. Hann bjó í Brimnesi.

Athugasemdir

[Tómas Örn Sigurbjörnsson (IP-tala skráð) 6.3.2009 kl. 10:27]

þarna var það...

[Númi (IP-tala skráð) 6.3.2009 kl. 14:56]

Hefur höfundur athugað það að fara að gefa út ljóðabók.?Skora á þig,þú ert snillingur,það er nú bara svo.

[Sigurbjörn Sveinsson, 6.3.2009 kl. 15:11]

Takk!

[Ína (IP-tala skráð) 6.3.2009 kl. 17:41]

Yndislega fallegt, þetta snerti við mér. Takk.

[Hilmar Gunnlaugsson, 6.3.2009 kl. 18:00]

Mjög flott.

[Ásta Sóllilja (IP-tala skráð) 6.3.2009 kl. 20:25]

Mig langar að skilja eftir athugasemd. En ég er orðlaus.

[Þórarinn Þ Gíslason (IP-tala skráð) 7.3.2009 kl. 16:52]

Sæll Sigurbjörn.

Þarna er svo sannarlega farið á flug.

Mjög gott. flott og skemmtilegt.

Kveðja.

[runni (IP-tala skráð) 12.3.2009 kl. 12:18]

skemmtilegt