Bragi bóksali fór með öfugmæli

í Kiljunni í gær. Mér finnst Bragi hreinasta fágæti og fagnaðarefni að hann skuli ljá máls á vist hjá Agli að hausti. Í gær fór hann hins vegar yfir strikið þegar hann sagði Kristján Albertsson hafa verið  "niðursetning Thorsættarinnar".  Eins og kunnugt er var Kristján frændi Thorsaranna í móðurætt. Kristján var þeirrar gerðar, að hann þurfti enga náfrændur til að sjá fyrir sér eða greiða götu sína í lífinu. Hann var vel menntaður og glöggur til orðs og stafs, í besta lagi ritfær og skildi efir sig merkilegt lífsstarf, þegar eingöngu er litið til menningar og bókmennta. Er ekki ofmælt að þar hafi hann borið af frændum sínum flestum.

Hins vegar var annar Thorsari á ferð í Kiljunni í gær, sem á sundurleitt en athyglisvert lífshlaup í íslenenskum bókmenntum.  Það væri meir við hæfi að kalla Thor Vilhjálmsson "niðursetning" Thorsaranna ef afstaða hans til lista og stjórnmála er skoðuð í ljósi sögu móðurættarinnar. Það má vera að geðríkur Þingeyingurinn hafi ráðið meiru um afdrif hans í lífinu en þær erfðir, sem hann fékk úr Danaveldi.

Athugasemdir

[Smjerjarmur, 29.4.2010 kl. 16:45]

Mér finnst Bragi ekki nægjanlega umtalsfrómur í þessum þáttum.  Vissulega er hann fyndinn og segir margt áhugavert, en níð og sleggjudómar um fólk eiga ekki heima í ríkisreknu útvarpi.  Þetta eins og margt annað hjá Braga virkar rætið á mig. 

[Ragnhildur Kolka, 29.4.2010 kl. 23:10]

Akkúrat það sem ég hugsaði - rætið.

[Jóhann (IP-tala skráð) 29.4.2010 kl. 23:58]

Bragi kveður stundum nokkuð fast að orði. Það gerir hann skemmtilegan. Við viljum enga framsóknarloðmullu, hvort eð er.

En að hann sé rætinn er kannski full langt seilst. Þá þurfið þið jafnframt að sanna að Bragi hafi viljað koma höggi á viðkomandi með illkvittnum hætti.

Það held ég sé fjarri Braga.

En laundrýldinn er hann, á afgerandi máta.