ASÍ kýs fremur að veifa röngu tré en öngu

Ekki get ég hrakið fullyrðingar ASÍ um heildartekjur lækna á Íslandi í samanburði við félaga þeirra á hinum Norðurlöndunum. ASÍ gefur engar heimildir upp fyrir niðurstöðum sínum. Hins vegar er ein áberandi villa í málflutningi þeirra sem vafalítið er með vilja beitt.

Íslenskir læknar notuðu dagvinnulaun sín og annarra lækna á Norðurlöndum til samanburðar í kjarabaráttu sínni. Ekki heildartekjur. Baráttan snerist um að bæta dagvinnulaunin þannig að lifa mætti af þeim. Um leið var það baráttumál að fólk kæmist af með styttri vinnutíma. Því var haldið fram alveg feimnislaust að læknar á Íslandi hefðu of stóran hlut heildartekna sinna af yfir- og vaktavinnu. Það er hlutskipti sem við eldra fólkið sættum okkur við á sínum tíma en yngri lækna hafna nú til dags góðu heilli.

Ekki ætla ég að hafa af félögum í ASÍ réttmætar kjarabætur. Öðru nær. Það fer hins vegar betur á því að fyrir þeim sé unnið með haldbærum rökum frekar en ósanngjörnum samanburði sem stenst ekki. 

Læknar með fjórfaldar dagvinnutekjur verkafólks

Athugasemdir

[Vagn (IP-tala skráð) 28.1.2015 kl. 00:34]

Hvernig væri að bjóða ASÍ félögum sama vinnuálag og læknar njóta í stað taxtahækkana? Vinnuveitendur verða alsælir með að losna við taxtahækkanir og fá lengri og fleiri vinnudaga.

[Margret S (IP-tala skráð) 28.1.2015 kl. 07:26]

ASÍ forstjórinn, Gylfi Arnbjörnsson er með hátt í tvær milljónir á mánuði í dagvinnulaun. Hann þarf ekki að vinna vaktavinnu fyrir þessi laun, sem greidd eru af verkafólki og öðru vinnandi fólki sem borgar í stéttafélög. Er það réttlátt að ASÍ starfsmenn séu með margföld laun flestra vinnandi stétta í landinu?