Helgarmoli: Leyndardómar víns og vísinda

Í hinni góðu bók er sagt að hóflega drukkið vín gleðji mannsins hjarta. Páll postuli ráðlagði lærisveini sínum, Tímóteusi, að fá sér eitt vínglas á dag vegna magans. Tímóteus virðist hafa verið magaveikur á yngri árum; ef til vill hefur hann verið stressaður. Það hefur ekki verið heiglum hent og án átaka að fylgja Páli eftir á leið hans um lífið. Páll hafði brýnt erindi. ´

Víða er hins vegar varað við ofdrykkjunni í hinni helgu bók og drykkjumaðurinn áminntur. Nói tók til óspilltra málanna þegar þornaði um og hann losnaði úr Örkinni. Hann ræktaði vínvið og drakk sig fullan. Fannst hann ber inni í tjaldi og urðu af því mikil eftirmál fyrir afkomendur hans. Sér þess enn stað. Kvöldmáltíð kirkjunnar og einkum hinnar kaþólsku líkist ekki hinni fyrstu heilögu kvöldmáltíð og þeim, sem á eftir fylgdu í frumkristninni. Nú neytir presturinn vínsins en söfnuðurinn brauðsins. Mér er sagt, að kvöldmáltíðirnar hafi í fornöld farið úr böndunum hjá hinum kristnu. Því hafi þessar ráðstafanir verið gerðar. Það sama vill henda á okkar dögum. Það enda ekki öll kvöldverðarboð eins og upp var lagt með. Kannski  ættum við að fá prestana til að drekka vínið? Þá bætist nú heldur á verkefnalistann hjá þeim. Útköll allar helgar.

Í nýjasta tölublaði Journal of the National Cancer Institute er birt rannsókn á 1300 þúsund konum á Bretlandi, sem gengust undir skimun vegna brjóstakrabba. Kannaðir voru drykkjusiðir þessara kvenna og tengsl þeirra við mörg krabbamein. Niðurstaðan var sú, að greinileg línuleg tengsl voru á milli áfengisneyslu og hættu á ýmsum krabbameinum svo sem í brjóstum, öndunarfærum og í meltingarvegi.  Heildarniðurstaðan var sú, að fyrir hvern einn sjúss á dag jókst áhættan um 1,5%. Eða með öðrum orðum hver sjúss skýrði 15 umframtilfelli krabbameina fyrir hverjar 1000 konur. Rannsóknin gefur ekkert tilefni til að álykta, að til séu e-r hættulaus mörk hvað þetta varðar.

Hver verða þá afdrif þeirra, sem neyta áfengis? Þessu svara höfundarnir ekki. Þessi rannsókn svarar því ekki, hvort þessar konur lifa lengur eða skemur. Höfundarnir hafa vafalítið þær upplýsingar, þó ekki hafi verið úr þeim unnið eða a.m.k. þær ekki verið birtar.

Margvíslegar vísindalegar niðurstöður gefa til kynna, að hóflega drukkið vín lengi mannsævina, bæti árum við lífið. Rannsókn á tæplega 30 þúsund hjúkrunarfræðingum í Bandaríkjunum, sem fylgt var eftir í áratugi, sýndi að þeir þátttakendur í rannsókninni lifðu lengur, sem drukku 1-2 vínglös á dag. Eins og kunnugt er tók almenningur þessum niðurstöðum og öðrum svipuðum vel og læknar nýttu þær til ráðlegginga. Þessar rannsóknir, sem til er vitnað, sýna einnig, að drykkja umfram þessi tvö glös grefur undan heilsunni eða fækkar ævidögunum a.m.k. Minna er gert með þær upplýsingar.

Þetta kennir okkur auðvitað, að ekki má lesa annað út úr vísindunum en þar er að finna. Við getum auðveldlega farið villt vega, ef ekki er skyggnst nægjanlega á bak við það, sem fram er borið.

Farið svo varlega um helgina, njótið lífsins og spillið því ekki.  Ekki láta okkur læknana trufla ykkur um of.

Athugasemdir

[Stjarna (IP-tala skráð) 27.2.2009 kl. 00:18]

Er ekkert talað um flöskuár eins og pakkaár. Sterk, brennd, rauð eða hvít flöskuár, ágætisviðbót við journalinn

[DoctorE (IP-tala skráð) 27.2.2009 kl. 21:02]

Ég er þá áhyggjulaus, ég drekk eiginlega aldrei... og staupa mig ekki á Sússa í kirkju.

Annars fékk pabbi kunningja míns sér alltaf matskeið af svartadauða á hverjum morgni, hann varð næstum 100 ára.

Sumir vilja meina að krabbameinið fæðist strax í móðurkviði... sem gæti vel verið...
Allt er gott í hófi er mottóið mitt.. nema náttlega í trú ;)

[DoctorE (IP-tala skráð) 27.2.2009 kl. 21:03]

Alls ekki ætla sem svo að ég vilji að menn stundi trúarbrögð í óhófi... best að hætta alveg, taka 1 sec í einu ef með þarf ;)

[Ásgrímur Hartmannsson, 27.2.2009 kl. 23:11]

Já... samkvæmt þessum nýjustu rannsóknum er vín eitur fyrir kvenfólk en lífselixír fyrir karlmenn.  Merkilegur andskoti.