Sigurbjörn Sveinsson

2.6.2009 | 10:04

Kantorinn í Skólavörðuholtinu

Ég var á vortónleikum Mótettukórs Hallgrímskirkju í gær. Það var himneskur söngur. Kórinn söng alla dagskrána án undirleiks, a capella, enda þurfti einskis annars með. Þessi stóri hópur söngvara var eins og eitt hljóðfæri. Aftan við hann gnæfði Klasorgelið á vesturveggnum með allar sínar þöglu raddir en úr lifandi börkum streymdu tónar engum öðrum líkir.

Í kór sem þennan koma menn og fara. Samt sem áður eru breytingarnar frá ári til árs varla merkjanlegar nema hljómurinn batnar eins og í góðri fiðlu, sem eldist vel. Því ræður stjórnandinn.

Það var mikið lán íslensku menningarlífi þegar Hörður Áskelsson réðist að Hallgrímskirkju kornungur fyrir bráðum mannsaldri. Hann virðist bera jafn djúpa virðingu fyrir listinni og hinu trúarlega innihaldi, sem boða á í kirkjunni.

Flokkur: Stjórnmál og samfélag | Breytt 3.6.2009 kl. 18:54 | Facebook

Athugasemdir

Ég er bara alveg hættur að fara á tónleika síðan ég hætti að krítisera villt og galið. Þetta er svo dýrt. En góður er Hörður og hans fólk.

Sigurður Þór Guðjónsson, 2.6.2009 kl. 11:07

Gaman að heyra! Ég get nú sagt frá því að hann afi minn Magnús var járnamaður og starfaði hann við byggingu Hallgrímskirkju frá byrjun framkvæmdanna til enda þeirra.

Þessi kirkja er náttúrulega alveg kolgeggjuð, leitun að öðru eins reverbi og delay -:), en alveg ómótstæðilegur hljómur engu að síður.

Gaman að heyra að kórinn sé í fínu standi. Ég segi eins og Siggi að ég nenni aldrei á konserta enda er það allt of dýrt.

sandkassi (IP-tala skráð) 2.6.2009 kl. 17:18

Þessi konsert var peninganna virði enda verðið á bíómiða með 50% álagi. Konsert er augnablik, sem ekki verður endurtekið og jafnvel ekki metið til fjár.

Það er gaman að heyra af honum afa þínum. Þá hafa þeir verið samstíga í þessu afar okkar því hann afi minn tók fyrstu skóflustunguna og sleikti með síðustu múrskeiðinni í turninn ég veit ekki hvað mörgum áratugum síðar. Það er til mynd af honum á níræðisaldri þarna uppi í turninum og fæ ég fiðring í hnén í hvert skipti sem ég hugsa til þess.

Sigurbjörn Sveinsson, 2.6.2009 kl. 17:27

Já, þá hafa þeir verið saman í þessu, merkilegt! Það er alveg rétt maður á að fara meira.

sandkassi (IP-tala skráð) 2.6.2009 kl. 17:32