Bestu meðmæli sem þessi framkvæmd getur fengið

Andstaða ungra sjálfstæðismanna eru bestu meðmæli fyrir þessa framkvæmd. Hún sannar enn á ný að Sjálfstæðisflokkurinn er heillum horfinn og í engum takti við þarfir mannlífsins hér á Fróni. Að leggja stein í götu menningarinnar og "snúa hana hægt úr hálsliðnum" eins og Guðni Guðmundsson orðaði svo vel eru þeirra ær og kýr. Þeir gera sér enga grein fyrir að sé menningunni ekki sinnt amk. á svipaðan hátt og gert er annars staðar, þá verður atgervisflóttinn enn frekari héðan og fólkið mun kjósa að búa þar en ekki hér.  En þetta skilja Sjálfstæðismenn ekki. Þeir eru enn í björgum sinnuleysisins eða jafnvel rænuleysisins sem þeir fóru fram af fyrir misserum.

Vilja að byggingu Tónlistarhúss verði hætt

Athugasemdir

[Guðmundur Ásgeirsson, 26.5.2009 kl. 16:25]

SUS gagnrýnir bygginguna fyrir að fara fram úr áætlunum og illa meðferð á almannafé.

Þeir geta trútt um talað...

[Sigurður Þórðarson, 26.5.2009 kl. 16:29]

Hvar vilt þú skera niður 80 milljarða, til að byrja með? Ef minni skref verða tekin mun niðurskurðurinn verða enn dýpri síðar.

Síðasta ríkisstjórn kom Íslandi á hausinn en núverandi stjórn þorir ekkert að gera og engu að breyta.  

Ég lýsi eftir stjórnmálamönnum sem þora að segja sannleikann:  Framundan er tími uppsagna og launalækkana.  

[Gísli (IP-tala skráð) 26.5.2009 kl. 16:30]

Endemis vitleysa sem kemur úr þér.

Hvaðan ætlarðu að taka þá peninga sem þarf til að ljúka framkvæmdum?  Hvar ætlarðu að skera niður?  Svaraðu þessu og haltu svo áfram að gagnrýna tillögur SUS.

[Ómar Sigurðsson (IP-tala skráð) 26.5.2009 kl. 16:44]

Þarna talar læknir sem er á ríkisspenanum og þarf ekki að hafa áhyggjur, hann vill halda áfram að mæta í Óperuna og á Sinfoníutónleika, ekkert má raska lífsgæðum hanns á meðan stór hluti þjóðarinnar hefur ekki til hnífs og skeiðar. Skammastu þín Sigurbjörn.

[Kalli (IP-tala skráð) 26.5.2009 kl. 17:01]

Það er enginn að leggja stein í götu menninga og lista. Besta lausnin væri að efna til hugmyndasamkeppni um hvernig best væri að pakka húsinu inn næstu 10 árin eða svo. Kostar sennilega ekki meira en 50 milljónir, smáaurar í samanburði við milljarðana sem það kostar að reysa húsið. Þarna gætu bestu listamenn á Íslandi sett hausinn í bleiti, en sennilega myndi einhver Þýski listamaðurinn hreppa hnossið því þeir eru vanir slíkum gjörningi. Sjáið þið tónlistarhúsið fyrir ykkur innpakkað í fagurbláan segldúk með silfurlitaðri slaufu?

[Sigurður Þór Guðjónsson, 26.5.2009 kl. 17:04]

Þó þetta tónlistarhús rísi ekki mun óperuflutningur ekki leggjast af og sinfóníutónleikar munu halda áfram. Af því að fólk hefur gaman af músik. Eitt er að vera á móti byggingu þessa tónlistarhúss af ýmsum ástæðum en ég undra mig oft á þeim beina menningarfjandskap sem kemur fram í skrifum og ekki síst athugasemdum um tónlistarhúsið og kemur t.d. vel fram í athugasemd Ómars.

[Þorri Már Gunnarsson (IP-tala skráð) 26.5.2009 kl. 17:21]

Ég er alveg sammála þér Sigurbjörn.

SUS menn ættu að líta sér nær áður en þeir fara að lýsa yfir svona þvælu.

Hvað með allar íþróttahallirnar sem hafa risið út um allan bæ.

Hvað segja SUS menn við þeim?

[Hjörtur J. Guðmundsson, 26.5.2009 kl. 18:25]

Þetta var bruðl frá upphafi.

[Alexander Kristófer Gústafsson, 26.5.2009 kl. 22:18]

Tónlistahúsið hafði aldrei átt að vera samþykkt

[haukur kristinsson (IP-tala skráð) 26.5.2009 kl. 23:38]

verst að við gátum ekki klárað þetta dæmi fyrir hrunið

[Bjarki (IP-tala skráð) 27.5.2009 kl. 08:19]

Tónlistar- og ráðstefnuhöllin hefur aldrei snúist um menningarstarf, þetta virðist vera útbreiddur misskilningur. TRH var gróðabrall útrásarvíkinga sem stukku á tónlistarhúsvagninn til að tryggja samvinnu ríkis- og borgar við sig. Húsið er allt of stórt, allt of dýrt og á fráleitum stað miðað við þarfir sinfóníu og óperu. Best væri að horfast í augu við veruleikann og brjóta niður það sem komið er af TRH, það væri "mannaflsfrek framkvæmd". Um leið ætti að hefja undirbúning nýs tónlistarhúss sem byggt væri í kringum þarfir óperu og sinfóníu og finna því heppilegri stað en þarna í særokinu. Slíkt hús þarf ekki að kosta nema þriðjung eða helming af því sem ríki og borga eiga eftir að leggja í glyshöllina ef haldið verður áfram með hana.

[Þorgeir Ragnarsson (IP-tala skráð) 27.5.2009 kl. 09:54]

Tónlistarhúsið var algjör tímaskekkja þegar farið var af stað með það. Enn ein stórframkvæmdin sem sett var í gang á gengdarlausum þenslutímum sem urðu m.a. vegna annarra stórframkvæmda. Skárra hefði verið að safna fyrir skriflinu í góðærinu og setja framkvæmdina síðan í gang þegar kreppan hófst. Ég held að enginn sé andstæðingur tónlistarhúss í sjálfu sér, slíkt væri fráleitt, en það er hægt að vera andstæðingur þess hvernig farið er að hlutunum.

Í þeirri sannleiksfælni sem nú ríkir í þjóðfélaginu er mikið gargað á Keynesískar lausnir til þess að koma hjólum efnahagslífsins af stað. Það gleymist (viljandi?) að taka fram að til þess að notast við þessa aðferðafræði hefur ríkið aðeins tvö úrræði: Skuldsetningu eða seðlaprentun. Hvorug lausnin er góð og hvað skuldsetningu varðar þá má ríkissjóður ekki vera svo skuldugur fyrir að ekki sé hægt að bæta við, sem er sennilega tilfellið hjá okkur núna.

Ég get því ekki annað en verið sammála Sigurði Þórðarsyni hér að ofan um það að hjá stjórnmálamönnum er nú mikill skortur á sannsögli.

[Hlédís, 27.5.2009 kl. 10:58]

Flókið, erfitt mál.

Ég skil SUSa-greyin og held ekki að þeir stingi upp á þessu í "menningarfjandsamlegum" tilgangi. Flottræfilshátturinn ætlar að verða okkur dýr, einn ganginn enn.

[Guðmundur Ásgeirsson, 27.5.2009 kl. 21:18]

Alveg sama hvort þið eruð með eða á móti Tónlistarhúsinu, þá er það hálfbyggt nú þegar og tilvist þess þar með orðin staðreynd. Vilijð þið láta það standa fokhelt eins og opið sár í miðbæ höfuðborgarinnar um ókomin ár? Hélt að fólk á ykkar aldri hefði lært þessa lexíu þegar Þjóðarbókhlaðan var í byggingu, frá því áður en ég fæddist og fram að fermingu! Eða Hallgrímskirkju, sem kostaði meira í viðhaldi á byggingartímanum en fór í bygginguna sjálfa.

Það þarf að hugsa svona dæmi alla leið, annars er það bara eins og brandarinn um Hafnfirðinginn sem var að reyna að synda til Vestmannaeyja, en sneri svo við þegar hann var kominn langleiðina vegna þess að hann var orðinn of þreyttur til að halda áfram.

[Guðmundur Ásgeirsson, 27.5.2009 kl. 21:20]

Hér að ofan þar sem stendur "fokhelt" átti auðvitað að standa hálffokhelt.

[Sigurbjörn Sveinsson, 27.5.2009 kl. 23:00]

Þetta er góð samlíking og mælir með verklokum, hvað sem öðru líður. Gaflararnir eu oft til fordæmis.

[EE elle (IP-tala skráð) 28.5.2009 kl. 23:33]

Húsið er of dýrt og óþarflega stórt.   Líka vil ég hafa opið út á sjóinn og ekki háhýsi fyrir honum.

[Ólafur Sveinsson (IP-tala skráð) 29.5.2009 kl. 16:50]

Hvar voru þessir andstæðinga tónlistarhúss, fyrir hrun??

Það heyrði minnstakosti ekki mikið í þeim.  TRH verður tekjulynd að lokum.

Þarf ekki rökstyðja það, eða hverjar eru gjaldeyristekjur landsmanna  af t.d. 1000 -1500 manna ráðstefnu ?

[Ólafur Sveinsson (IP-tala skráð) 29.5.2009 kl. 19:31]

tekjulind

[EE elle (IP-tala skráð) 30.5.2009 kl. 01:36]

Ég get svarað fyrir mig Ólafur, en ekki hina.  Ég bara áttaði mig ekkert á þessu fyrr en fyrir um 1/2 ári hvað byggingin ætti að vera fokdýr og mikilfengleg.  Og líka, núna vitum við það sem við vissum ekki: Að efnin/peningarnir fyrir byggingunni voru bara plat

[Ólafur Sveinsson (IP-tala skráð) 30.5.2009 kl. 19:39]

EE og fleiri.

Það er kannski eðlilegt, að láta plata sig  af KR ingnum og leiksjórnanda West Ham.  En málið snýst um hvernig við drögum okkur upp úr kviksyndinu, sem byggingin er komin í.   Öll rök hníga að því að halda áfram.  Gaflarnir hafa oft (stundum) rétt fyrir sér.  Hriflu Jónas og fleiri byggðu fjölda héraðsskóla, sundhöllina og Landsspítalann, mitt í kreppunni miklu, 1929........

[Tómas Örn Sigurbjörnsson (IP-tala skráð) 31.5.2009 kl. 23:00]

Óli, Óli...þarna er Frammara rétt lýst þegar hann reynir að klína hruni á KR. KR á engan þátt í þessu og ég frábið mér að þú dragir þetta besta lið VERALDAR inn í umræðuna. Ekki hafa KR-ingar kennt Frömmurum um hrunið þó svo að Hannes Smárason sé Frammari ;)

[Sigurbjörn Sveinsson, 1.6.2009 kl. 19:42]

Strákar! Ekki missa ykkur.

[Tómas Örn Sigurbjörnsson (IP-tala skráð) 1.6.2009 kl. 20:23]

þetta er allt á laufléttu nótunum..