Tilraun til ritskoðunar?

Ef frétt Stöðvar 2 frá í gær er skoðuð opnum huga, þá virðist þar ekkert vera, sem gengur í berhögg við það, sem forstjóri HSU segir eða ákveðið hefur verið. Samt sem áður er fréttin sögð "ósönn" í eftiráskýringu stofnunarinnar. "Fake news" er þetta kallað vestan hafs og hafa allir sanngjarnir menn ímigust á því hugtaki, þegar notað er um staðreyndir. 

Það er ljóst, að hér hefur e-m sviðið sannleikurinn og þrýst á um "hvítþvott".

Harma „óvandaðan fréttaflutning“

Aftur þarf að smala köttunum í VG

Það þarf mikið ímyndunarafl til að túlka grein Áslaugar Örnu, Brynjars N. og Jóns G. í Morgunblaðinu í gær sem heiftarlega árás þingmannanna á heilbrigðisráðherrann. En Rósa Björk vílar það ekki fyrir sér enda verið sjálf í stjórnarandstöðu frá upphafi vega.

"„Og þar með er um að ræða mjög grimma stjórnarandstöðu þingmanna Sjálfstæðisflokksins út í heilbrigðisráðherra og stefnu hennar í heilbrigðismálum. Og þetta er einmitt eitt af því sem ég óttaðist þegar ég gagnrýndi þetta stjórnarsamstarf við Sjálfstæðisflokkinn að Sjálfstæðisflokkurinn yrði aldrei tilbúinn í þær kerfisbreytingar sem hefur verið kallað eftir hér í íslensku samfélagi á árunum eftir hrun. Og mér finnst þessi grein sem birtist í gær í Morgunblaðinu, þar sem þrír þingmenn skrifa undir á höfuðborgarsvæðinu, mér finnst þetta ekki vera gagnrýni, mér finnst þetta vera árás, árás á heilbrigðisráðherra. Og orðin, sem þar eru notuð, eru ekkert verið að tala undir rós eins og kannski Óli Björn hefur verið að gera í sínum greinum heldur er þarna um að ræða orðalag sem ekki er hægt að túlka öðru vísi en beina árás á heilbrigðisráðherra."

Það á semsagt að kona illu af stað hvað sem það kostar. Þessi ríkisstjórn er varla á annan vetur setjandi.  

Ferskt vatn í 500 þús. tonna tankskipum frá Íslandi er handan við hornið

Að draga ísjaka frá Suðurskautslandinu til Afríku er frumstæðari hugmynd en að flytja vatn frá Íslandi, sem tilbúið er á neyrsluumbúðir. Það getur tekið um 3 daga að fylla tankskip af vatni af þessari stærðargráðu og nokkra ferkílómetra af vatnasvæði Bláfjalla. 

Ferðaiðnaðurinn er dekur við tímabundna auðlegð og ranga gengisskráningu en vatnsútlutningur er svar við óumflýanlegri eftirspurn fátækra jarðarbúa. 

Vill draga ísjaka til Suður-Afríku

Kjalarnesið er slysagildra

Of mörg óhöpp, of mörg banaslys á þessum kafla Kjalarnessins. Óþarfi er að hafa um þetta mörg orð. Tölfræðin talar sínu máli. Nú er svo komið, að fólk ekur þarna um með hálfum hug. Sérstaklega á þessum beina kafla og eins norðan við Esjugrundir má búast við óvæntu aksturslagi og hraðaakstri.

Þessu verður að linna. Það verður að fara í endurbætur á veginum þegar í stað. 

Óska eftir vitnum að árekstrinum

Það verður að finna lausn á gjaldmiðilsvandanum

Það er einkennilegt hve menn berja hausnum við steininn, þegar bent er á mikilvægi þess, að fundin sé lausn á þeim vanda, sem kvikulum gjaldmiðli fylgir. Tiltölulega fáar atvinnugreinar standa undir verðmætasköpun hér á landi. Sveiflur innan þeirra greina, þar sem mest utanríkisviðskipti eru stunduð, þar með talin ferðaþjónustan, valda nánast óviðráðanlegum dýfum annars staðar í atvinnulífinu.

Oft er haft á orði að sígandi lukka sé best. Það, hvernig ríghaldið er í hátt gengi krónunnar á okkar dögum og tímabundið ríkidæmi þorra almennings, minnir nokkuð á spákaupmennskuna með síldina á dögum Íslandsbersa í Kaupmannahöfn. Verðið hækkaði sífellt, salan var látin reka á reiðanum, þar til síldin var ónýt og óseljanleg.

Erum við Íslendingar enn hráefnisframleiðendur og ófærir um að hemja gróðafíknina í þágu framtíðarinnar?

„Við getum ekki borgað okkur laun“

Gisin borgarlína kallar á einkabílinn og strætó

Síðustu hugmyndir um borgarlínuna kalla á öflugt net tengilína. Hætt er við, að áframhaldandi not einkabílsins freisti margra. Höfuðborgarsvæðið er eins og smjörklípa, sem dreift hefur verið úr umfram flestar aðrar borgir, þangað sem hugmyndir um borgarlínuna eru sóttar. Borgarlínan eins og nú er hugsuð, krefst einnar eða fleiri skiptistöðva fyrir marga, sem ætlað er að nota hana. 

Hér þarf að bæta um betur.

Fleiri farþegar grundvöllur borgarlínu

Hækkun virðisauka á ferðaþjónustu er skattalækkun fyrir landsmenn

Samhliða hækkun virðisaukaskatts á ferðaþjónustuna er ráðgert að lækka almennu virðisaukaskattsprósentuna. Þetta mun auðvitað koma fram í lægra þjónustu- og vöruverði í landinu. Ef ég man rétt þá eru erlendir ferðamenn um og yfir 90% þeirra, sem eru viðskiptamenn ferðaþjónustunnar.Á þeim mun hvíla þessi hækkun, sem leiðir til lækkunar fyrir okkur hin.

Þeir þingmenn, sem andstæðir eru skattabreytingunni standa í vegi fyrir skattalækkun fyrir allan almenning og vilja auk þess viðhalda niðurgreiðslum í ferðaútvegi. 

Fyrir okkur hin, sem viljum ekki skattgalækkanir á þessum tímum þenslu og mikilvægra afborgana af skuldum ríkisins, væri skynsamlegast að hækka virðisaukaskatt á ferðamenn og halda almennu skattprósentunni óbreyttri. 

Fleiri efast um skattahækkun

Píratar eru ekki píratar; þeir eru loddarar

Hvenær hafa píratar haft einhvern áhuga á Evrópusambandinu. Ekki settu þeir það á oddinn í síðustu kosningum. Þvert á móti. En nú á að kanna hug þjóðarinnar til þess og það með fyrstu skipum.En allir sanngjarnir menn sjá i gegnum bragð af þessu tagi. Því er ætlað að koma þvingu á Viðreisn.

Pírötum mun ekki verða kápan úr því klæðinu. Viðreisn mun koma með krók á móti bragði og haga málum þannig, að kosningar um þetta tiltekna mál fari fram í samræmi við stjórnarsáttmálann. 

Vilja kjósa um nýjar viðræður við ESB

Greiðum fyrir vegagerð með sköttum

Mér og mörgum öðrum var illa brugðið þegar fréttist af ákvörðunum Jóns Gunnarssonar um hvað skyldi víkja í vegaframkvæmdum vegna ófullnægjandi fjármögnunar í fjárlögum. Það er auðvitað rétt hjá honum að ekki verður framkvæmt fyrir krónur, sem ekki er verið að afla. En það er líka álitamál, hvort Alþingi eigi ekki að sjá um þessar ákvarðanir en ekki ráðherrann. 

Óánægjan með frestun framkvæmda í Berufirði og í Gufudalssveit er hafin yfir gagnrýni. Þessar vegabætur hafa staðið fyrir dyrum árum saman og væntingarnar við síðustu vegaáætlun miklar og eðlilegar.

Þessi ríkisstjórn, sem nú situr virðist óvenju feimin við skattheimtu eins og allar ríkisstjórnir, sem Sjálfstæðisflokkurinn veitir forystu. Sjálfstræðismenn lamast í hnjánum, þegar minnst er á skatta. Þetta er í blóðinu. En Sjálfstæðismenn gleyma því einlægt, að skattheimta getur verið mikilvægt og nauðsynlegt hagstjórnartæki, sérstaklega á þenslutímum, þegar þörf er á aðhaldi í ríkisfjármálum.

Nú er einmitt tíminn til að beita þessum ráðum í við hagstjórnina. Það er engin lausn að afla tekna úr öðrum hagkerfum þ.e. frá ferðamönnum til að byggja vegi. Þá eigum við að byggja sjálf einmitt núna, þegar þörf er á að hefta einkaneysluna. Skattana á ferðamenn eigum við að nota til að greiða niður skuldir og búa í haginn fyrir komandi kynslóðir.

Það verður að fara í þessar vegabætur og fjármagna þær með aukinni skattheimtu um 1,5%.  

Ákvörðun ráðherra stenst ekki lög

Óþelló og Jón Viðar

Sá Óþelló í gær í Þjóðleikhúsinu. Það var mikið leikhús og gott. Ný sköpun úr gömlum texta. Ný snörun af gamalli tungu. Ef menn gera engar tilraunir með Sjeikspír verður hann smám saman tímanum að bráð eins og allt það, sem endurnýjar sig ekki. 

Leikurinn var góður og aðalleikendurnir þrír komu skemmtilegfa á óvart. Ingvar og Nína Dögg voru frábær. Ingvar sannaði það, sem mann hafði grunað, að umtalaður leikdómur Jóns Viðars væri tómt bull. Leikstjórnin var greinilega undirstaða verksins og ill ummæli Jóns Viðars um leikstjórn Gísla Arnar óskiljanleg.

Ég er feginn að hafa farið á þessa skemmtilegu sýningu og að mislyndum leikgagnrýnanda hafi ekki tekist að spilla þessari kvöldskemmtun fyrir mér og konu minni.